رسالة الى الشعب

يا شعبي المهاود وصابر وساكت عليا وحاشيتي وبتجيب عــيال
يا شعبي الكويس رضيت بيا ريس هدمر عقولك واجيبلك ســعال

وأبو سرور عاجبني يا ريته يناسبني وممدوح حبيبي وكأنه جمال
وهاني وشاذلي و"عزو" وبازلي رجالي وخيانتي لـــهم م المحال

ومية مجاري وأهو النيل دا جاري هتشرب هتسكر وهتزيل جبال
و واسطة وكوسة وليك مني بوسة لخالك وعمك وبوس لي العيال
وأمني بدولة وفي بينا جــــوله هـــفلس خـزاينك وبينا قتال
ولو فـقر جـالك وهــدد مـجالك هاحطك في عبارتي(أيوة السلام)

هـــتنقذ عــيالك وحــالك ومالك وهتقولي:عمي ..هاجيبلك رجال
بتاكـل كـويس وترقـص تتيس ولو قـلت مــوتك هاقول احتمال

هتعمل مـظاهــرة وقـوة وقاهـرة هاعلق رقبتك هناك في الحبال
ومعقولة أغشك وأطــسك في وشك بصوت إسرائيلى وحبة سلام

هاحطك فـ (قاطري) فـ عيني فـ خاطري عليا الحريقة عليا المشال
هاشرد عيالك وأهين اللي شالك وأكبس جروحك بطوب أو رمال

و أحــبك كويس بتاكــل تتيس تربرب في كـرشك تفوق البغال
و تــقرا لــــريكي وكوكو وميكي ويمشي محمد كـمشية نوال
و أحبك مــطرقع مبهدل مـــفرقع تحب فـ ماريكا تموت في الجمال

و هتقول بلادي حبيبتي فـ فؤادي هوديك في زعبل في قلب الشوال
يا شـــعبي باحبك وأبوســك وأدبك هجيبلك يمينك في قلب الشمال

تقـــولي يا ريس دا دينك كويس تخــش فـ مـناقشة وتعمل جدال
تقولي هنحكم وشعبك مصمم يكون دا دســتورنا طول الآجـــال
هـــرنك في علقة وإيدي دي مالكة توديك ورا الشمس فوق في التلال
هاخليك تعــــبط تهـيس تخبط وهــتقول يارمزي أنا اسمي منال

يا شعبي يا دارس يا خـــريج مدارس علومك كتبها سفيه بارتجال
فخليك كـــويس وعاقل وكـــيس هــجيبلك في نوجه وعجه بريال

و قصري ومشاكله وشربه وأكله على دماغ رتــيبة وبلــــية وجلال
عشان خطر عادل و تامر و شاكر وعــــمك هــــنيدي وهالة ودلال
عشان خطر يســـرا وإلهـــام ونصرة ومــــنة ونيللي ونادية وآمال
فخليك ممــــــيس وقولي يا ريس و أقف في الطـــابونة وربي العيال

و إوعى الحديد لاسميك بليد وأعــــشق في صحــــبه كعشقك جمال
يا شــــــعبي ياقايم وراكع ونايم بتلــــعن جــدودي هاخليك مثال
و إوعى تفــــكر تخلــبص تمكـــر هاخليك قوامك في سجني اعتدال

يا شعبي العزيز رضـــــــيت بالكويز بتضرب في بانجو وحالك دا حال
و تمــــشي تهـــــيس وشكلك كويس وشايل همومك تملي في شوال
عارفني معاكـس مناكــــف مشاكس هاحطك في قمقم وهـــربك محال


--------------------------------------------------------------------------------