الحقوا الضحية التانية .. خوليو وصباح الدلع ههههههههههه

ازيك ياض انت وهو وهى وكله كله ....(بدايه اخر بلطجه المره دى)
عاملين ايه؟....تمام؟....كله السطه؟........
النهارده بقى هنكمل قصص التشريد ..ومعانا النهارده الواد محمد خليل طبعا كلكم عارفينه....وعارفين اكتر اللى هيحصل فيه...هههههههه....
استعد يا خوليو لان المنتدى كله هيشمت فيك النهارده.....(وانتوا مابتصدقوا انا عارفكوا)....

**********************

تبدا احداث قصتنا من احد المناطق الشعبيه بالقاهره حيث يقبع بطلنا خوليو فى بيت متواضع عالاخر(مش بمزاجه طبعا)....ومش هنخبى برضه ياجماعه ان الحاله كانت مش قد كده....
خوليو واخواته التسعه والحاج والحاجه قاعدين فى اوضه وصاله يعنى يادوب....والفطار بيبقى فول وكنزات بيبسى ....والغدا بيبقى فول برضه وقرصين طعميه من السنه اللى فاتت .....والعشا نفس القصه بس ممكن يستلفوا بيضتين من الجيران عالماشى كده...يعنى الحياه مديالوا احلى قفا....
المهم خوليو لما شاف العمليه كده مش هتنفع خالص.....راح قال الحاج : بقولك ايه يابوب....انا عايز اعمل مشروع كده عشان نظبط المسائل يعنى؟...فنظر اليه ابوه بقرف:وان شاء الله هتجيب الفلوس منين؟...انت مش شايف ان الحكايه مش مستحمله تهييس...فقاطعه بطللنا قائلا:لا يا حاج مانا مظبط كل حاجه...اتفقت مع عم حنفى بتاع الفول بعد ما عرفت انه عايز يفتح فرع تانى فى الحاره اللى جنبنا....انى هتولى مسئوليه الفرع التانى بنفسى....وهوه خلاص جاب العربيه وزنجفها تمام....فاضل بس الافتتاح النهارده.....
فقال له الحاج:وانت بقى يا فالح اللى هتعرف تظبط الكلام؟...فقال له خوليو عيب عليك ياحاج...انت عارفنى....وبعد محاولات استطاع خوليو اقناع البيت بمساله الشغل دى.....
وبالفعل من تانى يوم كان بطلنا واقف على عربيه الفول اياها....وكان طبعا متكيف عالاخر اكل ببلاش وفلوس وتظبيط...(مين قدك ياعم!)...
لكن اللى كان شاغل بطلنا السايبر اللى هوه واقف قدامه...لاحظ انه مبيفضاش ثانيه واحده...وكل يوم يسال نفسه هيا العيال دى بتعمل ايه جوه؟...وينتهى بيه الامر انه ينفض....
الى ان جاء اليوم اللى قرر فيه انه يقتحم السيبر ويعرف ايه اللى بيحصل...اه نسيت اقول ان بطلنا مالوش فى حكايه الكمبيوتر دى خالص...ولا يعرف بيتكلم عن ايه؟...اخره الاتارى اللى جاله هديه فى الثانوى من منظمه (كحرت طفلك) العالميه....
المهم دخل خوليو السايبر لقى الشباب كلهم قاعدين حاطيين السماعات على ودانهم وعمالين يتكلموا ويضحكوا...فقال للمسؤل عن السايبر :الا قولى ياكابتن هما العيال دول عاملين كده ليه؟
فنظر اليه صاحب السايبر باشمئزاز قائلا:بيشيتوا ياعم الحاج..انت جاى من كوكب تانى ولا ايه؟
فقال خوليو ببلاهه:ايه بيشيشوا دى انا مش شايف حد منهم معاه (سبارس) حته... هههههههه
فقال له صاحب السايبر:انت هتهزر ياض ولا ايه؟
بقولك بيشيتوا...يعنى بيعملوا شات...افهم بقه..
فقاطعه خوليو :ااااااااه مش تقول كده من الاول...ثم تابع يعنى ايه بقه الشات ده؟..بيعمل ايه يعنى؟....
طاااااااخ هوى صاحب السايبر بشلوت انما ايه متنقى على مؤخره بطلنا....قائلا:انت اهبل يالا ولا بتستهبل بقه....
فى حد مايعرفش يعنى ايه شات...تحب اناديلك البواب يقولك....ودون مقدمات خرج صاحب السايبر ينادى لعم عثمان البواب قائلا:عم عثمااااااااان تعالى ثوانى عايزك....فجاء عم عثمان وهوه بيجرى:ايه يا صاحبى هيا البت بتاعتى اون لاين ولا ايه؟...فقال له صاحب السايبر:لا ياباشا لسه...انا بس عايزك تفهم الافندى ده يعنى ايه شات؟...فنظر عم عثمان الى بطلنا باستحقار قائلا:الشات يازميلى باختصار انك تدخل على الميل بتاعك من الماسنجر سواء كان ياهو ولا هوت ميل وتقعد تكلم الناس وتظبط بنات وتعيش اللحظه...تقابل دى وتكلم دى وكده...فوقف بطلنا متنح حبتين...ثم تابع قائلا:ايه ده يعنى انا ممكن اظبط بنات من البتاع ده واقابلهم والكلام ده؟....ازاى انا مش فاهم حاجه خالص...!دا انا مش قادر اظبط حتى حته قطه من الشارع...وانت تقولى البتاع ده بيعمل كل ده؟...فقال له عم عثمان بقلبه الحنون:خلاص ياض دا انت صعبت عليا خالص كده....انا مستعد اعلمك من الالف للياء....بس انت اللى هتدفع يابرنس....يعنى باختصار على نفقتك الشخصيه....اوك؟
فقال له بطلنا دون تردد طبعا فل يا عم الحاج...انا معاك يابا....
فقال له عم عثمان خلاص بكره ان شاء الله نبتدى...فقال له خوليو :وليه مش من النهارده...فقاطعه عم عثمان قائلا:اتقل ياض...متستعجلش...وبعدين انا متفق مع البت بتاعتى اللى مظبطها على الياهو انى هكلمها النهارده....فقال بطلنا بسعاده ليس لها مثيل:طب ممكن اقعد جمبك واهو استفيد من خبرتك ...فقال له عم عثمان:امممممممم خلاص استبينا بس متحطش دماغك فى الشاشه انا برضه بحب اخد راحتى.....فقال له بطلنا على الفور:اوك يا باشا...استبينا..
وبالفعل قعد بطلنا وهو مش مصدق اللى بيحصل...البت عماله تكلمه ولا كانها بتكلم (برادبيت) ولا(توم كروز مثلا)...فقال بطلنا فى نفسه:يااااه اذا كان عم عثمان عامل كده....امال انا هعمل ايه بقه؟...واخذ يمنى نفسه بالحوارات اياها وانه خلاص اخيرا هيقضيها.....والحياه هتحلو معاه من تانى....
وعاد بطلنا مشغول البال جدا...مش دارى باللى حواليه....واستسلم لنوم عميييق....استعدادا لليوم المرتقب...
وبالفعل بطلنا مكدبش خبر....خلص الشغل اوام اوام...وقفل الحساب....ودخل السايبر....قائلا:صباح الفل ياجدعان...وطبعا محدش رد عليه لانهم مش سامعينه اساسا....وشويه وجه عم عثمان ودخل على بطلنا قائلا:جاهز يابرنس....النهارده بقه هتعرف حاجات اكسكلوسف عالاخر...فركز معايا بقه وبلاش غباوه...اوك؟
فاوما بطلنا براسه:تمام يا عمنا يلا نبدا الكلام...
فقال له عم عثمان بص يابا اول حاجه دلوقتى انك تعمل ميل على الياهو او الهوت ميل مش فارق...بس الياهو احلى لانه فيه نفسه شات اخر تمام...وعليه (مزز) يازميلى ايه؟...وخوليو كل ده مش فاهم حاجه طبعا....فبدا عم عثمان بالشرح المستفز لاهم خطوه انه ازاى يعمل ميل وكده؟...
وبطلنا كان خلاص هيخلى عم عثمان ينتحر...لانه من ساعه ما بدا يشرحله والواد خوليو هاريه اسئله غبيه عالاخر...فشويه يقوله :ليه البيانات دى كلها...هوه مش ممكن ادخل على الماسنجر برقم البطاقه وخلاص..(انت داخل قسم ياعم الحاج ولا ايه؟)....وشويه سؤال مالوش لزمه زى مثلا:هما ليه سموه هوت ميل؟...هاه؟...(اه صحيح ليه؟)...
المهم بعد حوالى اربع ساعات من الجهد الدؤوب كان بطلنا يعنى هاه بدا يفهم...وعم عثمان ربنا يخليه ويكرمه...عمله الميل على الاتنين....وظبطه تمام....
وهنا قال له عم عثمان:كده انا رسيتك عالصح...بس فى شويه نصائح كده لازم تاخد بالك منها وانت بتشييت...
اولا:اوعى تخليها تشوف صورتك او تفتحلها الكاميرا لانك كده مش هتسلك يا بوب خليها تقابلك على طول وتبقى قصاد الامر الواقع....فقاطعه بطلنا بغضب:قصدك ايه يعنى؟...فقال له عم عثمان:اسمع منى بس الكلام....وكمان مش من اول مره تقولها اكلمك مايك اوعى!...المصداقيه مهمه جدا ياض انت...واهم حاجه بلاش انك تعرف نوع البنت اللى قدامك وتمشى مع الموجه ودى بقه مهارات فرديه....كده انا هرشتك عالموضوع من اوله لاخره فل يانجم؟....فرد بطلنا:فل ياعمنا كده بقه كله فى السليم...فقال له عم عثمان يالا بقى روح طبق عملى وانا جمبك احسن البت كده هتزعل منى....
وبالفعل جلس بطلنا قدام الجهاز لاربع ساعات اخرى..انه يلاقى حتى حد من السودان ولا مدغشقر لكن مفيش...لكن خوليو ما استسلمش للياس...وبعزيمه البطل قرر انه يكمل تانى يوم.....
وبالفعل اصبح الشات حاجه اساسى عند بطلنا كل يوم زى الاكل والشرب....الى ان حانت اللحظه الحاسمه....الصناره اخيرا غمزت ياجدعان...
ايوه! اخيرا قدر بعد جهد وسهر ليالى انه يظبط مع بنوته كده بس شكلها اخر تمام....ومن مصر كمان..يعنى كل الاوبشنز متاحه ليه....
ومرت الايام وبطلنا كل يوم يقعد يتكلم معاها بالساعات ....وطبعا عمل بنصايح زعيم الشات العربى فى المنطقه....عم عثمان.....وقعد بقه تهيييس وفشر انما ايه....لدرجه انه فهمها انه فيه شبه كبير من ليوناردو دى كابرى (مش واسعه شويه....؟)وانهم لو كانوا شافوه قبل ما يعملوا الفيلم كان هوه هيبقى البطل بلا شك....(ايه يا واد الحلاوه دى)....
المهم البنت ازداد تعلقها بيه اكتر واكتر....لحد ما طلبت هيا تكلمه مايك عشان تسمع صوته الصوت بيدى انطباع برضه....وخوليو فى الاول عمل نفسه مش عايز والكلام ده والبنت تتحايل عليه...لحد ماكلمها بالمايك اخيرا.....واستمر الموضوع لفتره كبيره...كل يوم بالساعات طبعا....الى ان حدث المنتظر حدوثه(حلوه الحته الفصحى دى...في امل لسه...!)...
طلب بطلنا من البنت انها تقابله فى اى مكان عام.....وهى طبعا فى الاول حاولت تبينله انها خايفه ومش عايزه الكلام ده....ومش هينفع والحوارات الفاكسانه دى...لحد ما وافقت انهم يتقابلوا بس فهمته انها مش هتقعد كتير لحسن حد يشوفها ولا حاجه...وبابا راجل شديد خالص لو عرف انى قابلت حد من وراه هيزعل اوى....
المهم حان يوم اللقاء المرتقب....بطلنا نازل بالحته الزفره...وازازه الجيل اللى حاططها كلها تقريبا...(ام جنيه وربع...عادى يعنى)...وراح للمكان المحدد ...وكانت المفاجاه................الكبرى.......
ان ان ااااااااااااااااااااااااااان........تششششششش...




اكتشف بطلنا الحقيقه المره....
طلع كل الحوار مجموعه شباب من بتوع الاشتغالات اياها....ومجرد ما شافوه وعرفوه طبعا قاموا معاه بالواجب...
بمعنى آخر قلبوه ونفضوه عالاخر.....
وبطلنا لا يكاد يصدق ما يحدث...........الى ان قطع هذا الموقف صوت احدهم قائلا:متنساش تقول لعم عثمان ان البت اون لاين النهارده الساعه تسعه
هههههههههههههههه.....
وبكده يبقى بطلنا خد احلى قفا وصاية فى حياته..........معلش يا خوليو بقى ...تعيش وتاخد غيرها....ههههههه.....عشان تحرم ههههههههههه

وعاد بطلنا الى عربيه الفول سالما................



النهايه

هههههههههههههههههههههههههه
ههههههههههههههههههههههههههههههههههههههه
هههههههههههههههههههههههههههههههههههههههههههههههههههه
حلوه اوي
بجد بتعرف تألف كويس
لو عملت كتاب انا اول واحده هشتريه



بس
ماليكش دعوه بيا
يعني الغيني من التصويت بتاعك ده
اوك
علشان بس تبقي في السليم

ههههههههههههه

الحمد لله إنها عجبتك

وطبعا قصتك أنت اللى خلتها حلوة يا محمد

انما خوليو ........ هتشوف ايام سودا يا خوليو معايا ههههههههههه

ههههههههههههههههه

ربنا يخليكى .. ودايما كدة رافعة روحى المعنواتية

هههههههههه

وبالنسبة للتصويت لا انا ديمقراطى

يعنى همشى مع التصويت

وشايف ادمين هو عليه الدور هههههههه

الا لو جاب الرجالة ولحق نفسه هههههههههههه